Вилоятнинг асосий Наврўз байрами тантаналари “Ўзбекнаво” гастрол бирлашмаси вилоят бўлими хонанда ва раққосаларининг чиқишлари Ўзбекистон ва Қорақалпоғистон халқ артисти Маҳмуд Намозов, Ўзбекистон ва Қорақалпоғистонда хизмат кўрсатган артист Ҳосила Раҳимова, Ўзбекистонда хизмат кўрсатган артист Лола Аҳмедова, эстрада хонандалари Шаҳноза Отабоева ва Дилафрўз Ҳайитметованинг шўх-шодон қўшиқларига уланиб кетди.

Наврўз – халқимизнинг азалий қадриятлари, эзгу орзу-интилишларини мужассам этган, аждодларимиздан бизга мерос бўлиб келаётган қадимий байрам.

Сурхондарё вилояти ҳокими Тўра Боболов ўз табрик сўзи аввалида воҳа аҳли ҳамда меҳмонларини юртимизда кенг нишонланаётган ушбу энг гўзал ва ардоқли байрам билан табриклаб, Наврўзи олам юртимизга тинчлик-омонлик, бахту саодат, қут-барака олиб келишини тилади.

Сурхондарё вилоятининг асосий Наврўз байрами тантаналари муносабати билан ташкил этилган катта кураш мусобақасида мамлакатимизнинг турли ҳудудларидан, шунингдек, қўшни республикалардан ташриф буюрган полвонлар турли вазн тоифалари бўйича ўзаро куч синашишмоқда.

Вилоятнинг асосий Наврўз байрами тантаналари шоду хуррамлик билан давом этаётган айни дақиқаларда Термиз шаҳар ҳокимлиги қўрғонида ижтимоий ҳимояга муҳтож, кам таъминланган 10 дан ортиқ оилалар фарзандларининг суннат тўйлари ҳам ўтказиб берилмоқда.

 Наврўз сайлида воҳадошларимиз қатори хорижлик меҳмонлар ҳам иштирок этишмоқда. Юртдошларимизнинг қалбига кўтаринки кайфият бахш этиб, она заминимиз узра беназир таровати билан кириб келган бетакрор айём завқу шавқи уларнинг қалбида ҳайрат ва ҳавас уйғотди, десак муболаға бўлмайди.