Тоза ичимлик суви – Ер сайёрасида инсоният кун кўриши учун энг муҳим ва зарур манбалардан бири. Дунё аҳолиси ортиб бориши, иқлим ўзгариши ва бошқа омиллар сабаб тоза ичимлик суви танқислиги муаммоси пайдо бўлаётган ҳудудлар сони ҳам йилдан йилга ошиб бормоқда.

Уйда сув исрофини камайтириш, нафақат бу қимматбаҳо ресурсни асрашга, балки истеъмолчиларнинг ўз маблағларини тежашга ҳам ёрдам беради. Хўш сувни қандай тежаш мумкин?

- Оқаётган жумракларни, ҳожатхона, маиший техника ва майса (газон) пуркагичларни зудлик билан тузатинг. Оқиш кичик бўлиши мумкин, лекин вақт ўтиши билан улар катта сув ҳажмининг йўқотилишига олиб келади.

- Тишларингизни юваётганда сувни ўчиринг, бир стакан сув тиш ювиш учун етарли. АҚШ атроф-муҳитни муҳофаза қилиш агентлиги (ЭПА) маълумотларига кўра, бу оддий қадам бир ойда 700 литрдан ортиқ сувни тежаш имконини беради

- Кир юваётганда сувдан камроқ фойдаланинг. Кир ювиш машинаси юзлаб литр сувни сарфлаши мумкин, шунинг учун ундан оқилона фойдаланинг. Кир ювиш машинасини ишга туширишдан аввал кирни тўлиқ юклаш учун етарлича кийимингиз борлигини аниқланг. Ювиладиган кирлар сони оз бўлса, шунга мос равишда машинадаги сув сатҳини ростланг.

- Ванна-ҳаммом ўрнига иложи борича камроқ душ қабул қилинг. ЭПА маълумотларига кўра, агар сиз беш дақиқа ёки ундан камроқ вақт давомида душ қабул қилсангиз, сиз 30 дан 45 литргача сув ишлатасиз. Бу рақамни 300 литр сув сарфлайдиган ванналар билан солиштиринг.

- Иложи борича сувни тежайдиган жумраклар, кир ювиш машиналари, ҳожатхоналар ва идиш ювиш машиналарини сотиб олинг. Сув ва энергияни тежайдиган асбобларни сотиб олиш нафақат сувни, балки электр энергиясини ҳам тежашга ёрдам беради.

Сурхондарё вилояти ҳокимлиги Матбуот хизмати