Avval xabar berganimizdek, bugun Termiz shahridagi "Imom At-Termiziy" ilmiy tadqiqot markazining majlislar zalida viloyat hokimi To‘ra Bobolovning tadbirkorlar bilan navbatdagi ochiq muloqoti bo‘lib o‘tdi.
Samimiy muloqot hamda ishchanlik ruhida o‘tgan mazkur ochiq muloqotda viloyatdagi 110 dan ziyod tadbirkorlik subyektlari ishtirok etib, o‘zlarining tadbirkorlik faoliyatida yuzaga kelayotgan muammolari hamda tadbikorlikni rivojlantirish bo‘yicha tashabbuslari bilan ishtirok etishdi.
Ochiq muloqot davomida tadbirkorlar tomonidan 60 dan ziyod muammolar hamda 44 ta takliflar kelib tushdi.
- Denov tumanida "Qurbonali Tekstil" mas’uliyati cheklangan jamiyatimiz tomonidan bugungi kunda 120 nafar fuqarolarga ish o‘rinlarini tashkil qilganmiz, - dedi MCHJ rahbari Qurbonali Kazakov. - Bizga lider tadbirkor sifatida “Ipoteka-bank” ATIB viloyat filialidan 2 mlrd. so‘m kredit mablag‘i ajratilishi kerak edi. Tijorat banki tomonidan 800 mln. so‘m ajratib berilgan. Viloyat hokimidan qolgan 1,2 mlrd. so‘m kredit mablag‘ini ajratishda amaliy yordam so‘radim. Mas’ullardan shu yerning o‘zida izoh so‘rab, muammoyimni ijobiy hal etib berdilar.
Muammoli masalalarning 20 tasi joyida hal etilgan bo‘lsa, yechimi ma’lum vaqt talab etiladigan murojaatlarga mas’ullar belgilanib, aniq topshiriqlar berildi.
