Rasmiy munosabat

Surxondaryo viloyati hokimligi axborot xizmati 2021 yilning 22 fevralь kuni Davletovuz kanalida e'lon qilingan “Hokimiyat gigiyenasi haqida” hamda “Kun.uz” caytida berilgan “Surxondaryodagi mansabdor bir qancha xususiy kompaniyalarga egalik qilishi ma'lum bo'ldi” sarlavhali maqolalar yuzasidan quyidagilarni ma'lum qiladi:

Haqiqatdan ham hukumatning tegishli qarori bilan tasdiqlangan va davlat boshqaruvi organlari va mahalliy ijro etuvchi hokimiyat organlari uchun majburiy bo'lgan odob-axloq qoidalarining 15-bandiga ko'ra davlat xizmatchilarining tadbirkorlik faoliyati bilan shug'ullanishi taqiqlanadi.

Surxondaryo viloyati hokimligida kotibiyat mudiri lavozimida ishlab kelayotgan Asliddin Mengliyev hozirda tadbirkorlik faoliyati bilan shug'ullanmaydi, u biror bir xususiy korxonaning rahbari emas.

U bir paytlar rahbarlik qilgan “BONU-ELSHOD” xususiy korxonasi 2018 yilning dekabrь oyida, “JANUB SUV-INVEST QURILISH TA'MIR” MChJ 2019 yilda turli sabablarga ko'ra o'z faoliyatini to'xtatgan. Hozirda faoliyat yuritayotgan “JANUB EKSPORT” MChJ 2019 yilda, “OBOD-YURT TOMORQA XIZMATI” MChJ esa 2020 yilning aprel oyida tashkil etilgan.

A.Mengliyev Surxondaryo viloyati hokimligiga 2020 yilning 14 sentyabrida ishga kelgan. Demak bundan anglashiladiki, u ushbu xususiy korxonalarga Surxondaryo viloyati hokimligiga ishga kelgunga (davlat xizmatchisi bo'lgunga) qadar rahbarlik qilgan. Hozirda u tadbirkorlik faoliyati bilan shug'ullanmaydi, “JANUB EKSPORT” va “OBOD-YURT TOMORQA XIZMATI” mas'uliyati cheklangan jamiyatlariga rahbarlik ham qilmaydi.