Surxondaryoda mo''tabar ayollar, munis opa-singillar sharaflandi

Surxondaryo viloyat hokimligida 8 mart – Xalqaro xotin-qizlar kuniga bag'ishlangan tantanali tadbir bo'lib o'tdi.

Tadbirda viloyat hokimi To'ra Bobolov munis onaxon va opa-singillarimizni bayram bilan tabriklab, 17 nafar ayolga «Mo''tabar ayol» ko'krak nishoni va qimmatbaho sovg'alarni topshirdi.

Mamlakatimizda so'nggi yillarda xotin-qizlarning ijtimoiy-siyosiy faolligini oshirish, tadbirkorligini qo'llab-quvvatlash, bilim va kasbiy ko'nikmalar egallab, munosib ish topishlariga ko'maklashish, salomatligini saqlash, uy-joy bilan ta'minlash kabi muhim masalalarni hal etishga alohida e'tibor qaratilmoqda. Davlat darajasida ko'rsatilayotgan g'amxo'rliklar munis opa-singillarimizni yangi O'zbekistonni barpo etishning barcha sohalarida faol ishtirok etib, Vatanimizni ijtimoiy-iqtisodiy rivojlantirishga munosib hissa qo'shishga undayotir.

Surxondaryoda ham bu borada keng ko'lamli ishlar amalga oshirilmoqda. Ayni paytda voha aholisining 1 million 329 ming nafari yoki 49,6 foizi xotin-qizlardir. Ularning manfaatlarini ta'minlash va jamiyat hayotidagi o'rnini mustahkamlashning muhim vazifalari belgilab olingan.

Prezidentimiz raisligida joriy yil 26 fevralь kuni o'tkazilgan videoselektor yig'ilishi xotin-qizlarning muammolarini hal etish va ularni ijtimoiy qo'llab-quvvatlash borasidagi ishlar natijadorligini ta'minlashda asosiy yo'nalishlarni belgilab berdi. Shunga muvofiq viloyatda «ayollar daftari»ga kiritilgan xotin-qizlar muammolarini yechish, bandligini ta'minlash, tadbirkorligini qo'llab-quvvatlash, salomatligini saqlash, uy-joy masalalarini hal etish borasida tizimli ishlar boshlab yuborildi. Jumladan, vohada «Ayollar daftari»ga 28 ming 928 nafar xotin-qiz kiritilgan.

Birgina joriy yilning ikki oyida ularning 3 ming 566 nafariga manzilli yordamlar ko'rsatildi. Mazkur yo'nalishdagi ishlar izchil davom ettirilib, 9 ta mezon asosida ayollarni ish bilan ta'minlash, ijtimoiy qo'llab-quvvatlash, ularga tibbiy va psixologik yordam qamrovini kengaytirish, oilaviy ajralishlarning oldini olish chora-tadbirlari ko'rilmoqda. Uy-joyga muhtoj 118 xotin-qiz uchun uy barpo etilayotir.

Mamlakatimizda mo''tabar ayol zoti har taraflama ulug'lanib, mehnati munosib qadrlanmoqda. Prezidentimizning joriy yil 4 martdagi «8 mart – Xalqaro xotin-qizlar kuni munosabati bilan mukofotlash to'g'risida»gi farmoniga ko'ra, bir guruh surxondaryolik faol opa-singillar, mo''tabar onaxonlar davlatimizning yuksak orden va medallari bilan taqdirlangani ham bunga yaqqol misoldir.

Tantanali tadbirda bir guruh fidoyi xotin-qizlar viloyat hokimining faxriy yorliq va qimmatbaho sovg'alari bilan taqdirlandi.

Tadbirda so'zga chiqqan xotin-qizlar ko'rsatilayotgan e'tibor va g'amxo'rlik uchun Prezidentimizga chuqur minnatdorlik bildirdi.