Novosibirsk delegatsiyasi Sariosiyo tumanida qator obyektlar va loyihalar bilan tanishdi

Vohamizga amaliy tashrifini davom ettirayotgan Novosibirsk delegatsiyasi Sariosiyo tumaniga tashrif buyurdi. Mehmonlar Surxondaryoning tashrif qog‘ozlaridan biriga aylangan “Sangardak” sharsharasi bilan tanishishdi.

O‘ziga xos tabiati, tabiiy buloq suvli sharsharasi hamda ajib tog‘ manzaralari bilan nafaqat yurtimiz, balki xorijlik sayyohlar e’tirofiga sazavor bo‘layotgan maskan mehmonlarda katta tassurot uyg‘otdi. Ulug‘bek Qosimov va Andrey Travnikov sharshara hamda hududdagi sanatoriylarda yaratilgan sharoitlar bilan tanishib, hududlararo turizm oqimini rivojlantirish, novosibirsklik sayyohlar uchun Surxondaryo bo‘ylab tur-paketlar ishlab chiqish masalasini ham muhokama qildi.

Novosibirsklik sayyohlar uchun Surxondaryoning tog‘li manzillari, tarixiy arxitektura yodgorliklari hamda gastranomik va ekoturizm obyektlari katta qiziqish uyg‘otishi qayd etildi.

Shundan so‘ng, Novosibirsk gubernatori Andrey Travnikov Surxondaryo viloyati hokimi Ulug‘bek Qosimov hamrohligida Sariosiyo tumanida joylashgan “To‘palang” suv omboriga tashrif buyurdi. Viloyatimiz rahbari rossiyalik hamkasbiga “To‘palang” suv omboridan viloyat aholisini toza ichimlik suvi bilan ta’minlash bo‘yicha amalga oshirilayotgan mega loyiha haqida ma’lumot berdi.

Mehmonlar suv ombori hududida barpo etilgan, ekologik toza elektr energiyasi ishlab chiqaruvchi “To‘palang GES”i faoliyati, ish jarayonlari bilan tanishdi. Mutaxassislar elektr energiyasi ishlab chiqarish jarayonlari haqida batafsil axborot berdi.

Ma’lumot uchun, hududda suvning tabiiy tushish yo‘li, ya’ni bitta kaskadda “To‘palang”, “Zarchob 1”, “Zarchob 2”, “Zarchob 3” GESlari hamda “Zarchob -1 A” kichik GES barpo etilgan bo‘lib, ularda vohamiz elektr energiyasi ehtiyojining 40 foizi ishlab chiqariladi.

Novosibirsk delegatsiyasining Sariosiyo tumaniga tashrifining keyingi manzili “UzAgroLider” MChJning zamonaviy limonchilik issiqxonasi bo‘ldi. Viloyatimiz rahbari Ulug‘bek Qosimov va gubernator Andrey Travnikov limon yetishtirish jarayonlari hamda vohada yetishtirilayotgan meva-sabzavotlar bilan tanishishdi.

Novosibirsk gubernatori hushtam O‘zbekiston meva-sabzavotlari Rossiya bozorlarida xaridorgir mahsulot ekanligini ta’kidlab, qishloq xo‘jaligi mahsulotlarini yetkazib berish hajmlarini oshirish, bu boradagi hamkorlik aloqalarini kengaytirish tashabbusini bildirdi.

Shuningdek, hududda yetishtirilgan paxta dalasidagi hosil bilan ham tanishildi. Umumiy maydoni 225 gektar bo‘lgan kompleksda limon, brokolli, g‘alla, uzum, paxta va boshqa turdagi mevalar yetishtirish yo‘lga qo‘yilgan.

Novosibirsk gubernatori Andrey Travnikov va Surxondaryo viloyati hokimi Ulug‘bek Qosimov Sariosiyo tumanida joylashgan, yiliga 48 ming kvadrat metr eshik va deraza romlari ishlab chiqarish quvvatiga ega “Smart Communication” MChJga tashrif buyurdi. Mehmonlar ishlab chiqarish jarayonlari hamda tayyor mahsulotlar turlari bilan tanishishdi.

Imzo brendi ostida alyuminiy profillaridan zamonaviy eshik va deraza romlari ishlab chiqarayotgan korxonaning umumiy qiymati 117 mlrd so‘m bo‘lib, unda 200 nafar ishchi-xodimlar faoliyat yuritadi.

Novosibirsk delegatsiyasi Sariosiyo tumanida joylashgan “Surxon sifat tekstil” xususiy korxonasining ip-kalava ishlab chiqarish loyihasi bilan tanishdi. Ishlab chiqarish jarayonlari, tayyor ip-kalava mahsulotlari ko‘zdan kechirildi. Mutaxassislar korxona faoliyati va ish jarayonlari haqida ma’lumot berishdi.

Umumiy qiymati 331 mlrd so‘mni tashkil etuvchi ushbu loyihaning yillik quvvati 11 ming tonna ip-kalava bo‘lib, 500 ta ish o‘rni yaratilgan. Shuningdek, shu yerning o‘zida tashkil etilgan kiyim-kechaklar shourumi bilan ham tanishildi.

Shundan so‘ng, Surxondaryo viloyati hokimi Ulug‘bek Qosimov Novosibirsk gubernatori Andrey Travnikovga O‘zbekiston-Tojikiston davlatlari chegarasidagi "Sariosiyo" chegara bojxona posti hamda ushbu hududda erkin savdo markazi tashkil etish loyihasi bilan tanishtirdi.