Sessiyada deputatlar tomonidan muhokama qilingan masalalar yuzasidan qarorlar qabul qilindi

Bugun Xalq deputatlari Surxondaryo viloyati Kengashining navbatdagi yigirma birinchi sessiyasi o‘tkazildi. ZOOM ilovasidan foydalangan holda videomuloqot tarzda o‘tkazilgan sessiyada viloyatdan saylangan Oliy Majlisi Senati a’zolari, Xalq deputatlari viloyat Kengashi deputatlari hamda kun tartibidagi masalalarga aloqador boshqarma va tashkilotlar rahbarlari, shahar va tumanlar hokimlarining tegishli o‘rinbosarlari ishtirok etdi.

Sessiyada dastlab O‘zbekiston Respublikasi Prezidenti tomonidan mamlakatimiz mudofaa salohiyatini mustahkamlash, Qurolli Kuchlar jangovor shayligi va tayyorgaligini takomillashtirish, yoshlarni harbiy vatanparvarlik ruhida tarbiyalash yuzasidan belgilab berilgan vazifalarning viloyatdagi ijrosi to‘g‘risida Janubiy operativ qo‘mondonligi boshlig‘i Qodirjon Tursunovning ma’ruzasi tinglandi.

Xalq deputatlari viloyat Kengashining ijtimoiy-madaniy rivojlanish masalalari bo‘yicha doimiy komissiyasi raisi Shohida Xollieva “Davlat hokimiyati va boshqaruvi organlari faoliyatining ochiqligi to‘g‘risida”gi Qonunning viloyatdagi ijrosi, viloyat Iqtisodiy taraqqiyot va kambag‘allikni qisqartirish bosh boshqarmasi boshlig‘ining birinchi o‘rinbosari Elmurod Avazov voha hududlarini ijtimoiy-iqtisodiy rivojlantirishning “Reyting baholash tizimi” yuzasidan 2020 yilda amalga oshirilgan ishlar va 2021 yilda amalga oshirilishi lozim bo‘lgan vazifalar haqida axborot berdi.

Ma’ruzalar bo‘yicha muhim vazifalar yuzasidan xalq deputatlari viloyat Kengashi deputlarining fikr-mulohazalari, takliflari eshitildi.

Sessiyada shuningdek, xalq deputatlari Denov tumani Kengashining 2021 yil 27 yanvardagi “Denov tumanining tegishli aholi punktlarini Uzun tumani tasarrufiga o‘tkazish to‘g‘risida” 160/31-06-sonli qarorini tasdiqlash, Deputatlik vakolatini muddatidan oldin to‘xtatish, Xalq deputatlari viloyat Kengashi kotibiyati xodimlarining lavozim yo‘riqnomalarini tasdiqlash, O‘zbekiston Respublikasi Markaziy saylov komissiyasi a’zoligiga nomzod tavsiya etish to‘g‘risidagi masalalar ham ko‘rib chiqildi.

Joriy yilda O‘zbekiston Respublikasi Prezidentligiga saylov o‘tkazilishi munosabati bilan O‘zbekiston sog‘liqni saqlash xodimlari kasaba uyushmasi Respublika Kengashining Surxondaryo viloyati bo‘yicha mas’ul tashkilotchisi Kadirova Muyassar Djumaevnaning nomzodi Markaziy saylov komissiyasi a’zoligiga tavsiya etildi.

Sessiyada ko‘rilgan masalalar deputatlar tomonidan atroflicha muhokama qilinib, tegishli qaror qabul qilindi.