Бугун Сурхондарё вилояти ҳокими Тўра Боболов ахборот-кутубхона ривожига, аҳолига ахборот-кутубхона хизматлари кўрсатишнинг янги тизимини яратишга, кутубхоналарда сақланаётган миллий маданий меросни асраб-авайлаш ва бойитиш ишларига муносиб ҳисса қўшган, китобхонликни кенг тарғиб қилиш ва ёш мутахассис кадрлар тайёрлаш борасида самарали меҳнат қилган бир гуруҳ сурхондарёлик кутубхоначиларга “Ахборот-кутубхона аълочиси” кўкрак нишонларини топширди.

Аввал хабар қилганимиздек, бугун Шеробод туманида Ўзбекистон Республикаси Бош вазирининг ўринбосари – Инвестициялар ва ташқи савдо вазири Сардор Умурзаков бошчилигидаги вазирликлар, идоралар, тармоқ бирлашмалари ва тижорат банклари вакилларидан иборат Экспорт ва инвестицияларни ривожлантириш масалалари бўйича ҳукумат комиссиясининг воҳа тадбиркорлари ва экспортчилар билан очиқ мулоқоти ташкил этилди.

“Санъат саройи” ҳудудида жойлашган боғда Ўзбекистон ва Афғонистон ишбилармонлари иштирокидаги ҳудудлар ва тармоқлараро саноат ярмаркаси ҳамда кооперация биржаси, шунингдек, “Made in Uzbekistan” миллий маҳсулотлар кўргазмаси давом этмоқда.

Ўзбекистон – Афғонистон ишбилармонлари бизнес-форумида икки мамлакат тадбиркорлари қиймати 44 миллион долларлик ўзаро ҳамкорлик тўғрисидаги тўртта шартномани ҳужжатини алмашди. Ўзбекистон Савдо-саноат палатаси ва Афғонистон Савдо-саноат палаталари федерацияси ўртасида 2021-2022 йилларда ҳамкорлик қилиш бўйича “йўл харитаси” шартномаси имзоланганлиги ҳақидаги ҳужжат алмашилди.

Халқларимиз ўртасида узоқ ўтмишга бориб тақаладиган азалий дўстлик ришталари ва муштарак миллий урф-одатларимиз ҳамда давлатларимиз ишбилармонларининг ҳамкорлик алоқаларини янада мустаҳкамлаш йўллари хусусида фикр алмашилди.

Сурхондарё вилояти ҳокимлиги матбуот хизмати.