Комиссия аъзолари корхоналарга бир қатор сафарлар ташкил қилиб, ишлаб чиқарувчилар ва экспортчилар билан суҳбатда бўлдилар ҳамда ишлаб чиқариш объектларининг ҳозирги ҳолатини, ҳудуднинг ресурс ва саноат салоҳиятини ўргандилар, шунингдек, саноат ишлаб чиқаришини кўпайтириш, янги инвестиция лойиҳаларини ҳаётга татбиқ этиш, экспорт салоҳиятини юксалтириш ва янги иш ўринларини яратиш имкониятларини аниқлаш бўйича иш олиб бордилар.

Шунингдек, жойларда бевосита олиб борилган фаолият доирасида кеча шаҳар ва туманлар тадбиркорлари билан очиқ мулоқот ўтказилди. Унда тадбиркорларнинг таклиф ва муаммолари тингланди, таҳлили амалга оширилди ҳамда ечими юзасидан вазирлик, идора, тармоқ бирлашмалари, тижорат банклари ва маҳаллий ҳокимият органлари раҳбарларига тегишли кўрсатмалар берилди. Хусусан, инвестиция лойиҳаларини амалга ошириш ва айланма маблағларни тўлдириш учун кредит ресурсларини тақдим этиш, ер участкалари, бино ва иншоотларни ажратиш, рухсатномалар, сертификатлар ва лицензиялар олиш, олдин тўланган қўшилган қиймат солиғини қайтариш, корхоналарни муҳандислик коммуникацияларига улаш, солиқ ва божхона тартибга солишнинг алоҳида механизмларини қўллаш билан боғлиқ ва бошқа масалалар кўриб чиқилди.

Очиқ мулоқот давомида жами 210 та тадбиркорлик субъектининг мурожаатлари тингланди ва 243 та масала кўтарилди. Шундан 142 таси кредит ресурслари ажратиш, 16 таси – илгари тўланган қўшилган қиймат солиғи суммаларини қайтариш, 13 таси – корхоналарни муҳандислик-коммуникация тармоқларига улаш, 12 таси – ер ажратиш, 11 таси – экспорт фаолияти билан боғлиқ ва бошқа бир қатор масалалардир.
Йиғилиш интерфаол тарзда кечгани мавжуд муаммоларни очиқ муҳокама қилиш ҳамда навбатдаги саъй-ҳаракатларнинг оптимал алгоритмини белгилаш мақсадида муаммолар ечимининг йўлларини бевосита жойида, мутасадди раҳбарлар иштирокида кўриб чиқиш имконини берди.

Тадбиркорлар томонидан кўтарилган ҳар бир масала юзасидан муҳокама якунлари бўйича вазирликлар, идоралар, саноат бирлашмалари ва тижорат банкларининг масъул раҳбарларига аниқланган муаммоларни ҳал этишнинг муддатлари ва механизмлари аниқ белгиланган ҳолда тегишли кўрсатмалар берилиб, ижроси назоратга олинди.
Очиқ мулоқотда Сурхондарё вилояти ҳокими Тўра Боболов иштирок этди.