Президентимиз ҳузурида куни-кеча ўтказилган видеоселектор йиғилишида берилган вазифалар ижросини таъминлаш, инвестиция ва экспорт имкониятларини ошириш борасидаги ишлар билан танишиш мақсадида Сурхондарё вилояти ҳокими Улуғбек Қосимов ҳудудларга ташрифини Қумқўрғон туманида давом эттирди.

Дастлаб, "Уяс" маҳалласида яшовчи Ботир Нуралиев хонадонида иссиқхоначилик фаолияти билан танишилди. Шунингдек, хонадонда энергия тежамкорликни таъминлаш мақсадида геоколлектор қўйилган бўлиб, хонадон соҳиби билан энергия сарф-харажатларидаги фарқ ҳақида суҳбат қилинди. Вилоят раҳбари аҳолини шахсий томорқадан самарали фойдаланишга ўргатиш орқали камбағалликни қисқартириш, маҳсулот етиштириш ҳажмини ошириш, озиқ-овқат хавфсизлигини таъминлаш ҳамда экспорт кўрсаткичларини ошириш муҳимлигини таъкидлади.

Шундан сўнг, "Agro Processing Group" МЧЖнинг мева-сабзавотларни қайта ишлаш ҳамда қуритиш корхонасида аҳолининг етиштирган маҳсулотларини сотиб олиш ва тайёр маҳсулот ишлаб чиқариш ишлари билан танишилди. Вилоятдаги қайта ишлаш корхоналарининг мавжуд салоҳиятини тўлиқ ишга солган ҳолда аҳоли етиштирган маҳсулотларни қайта ишлаш, тайёр маҳсулотларни экспортга йўналтириш, иш ўринлари сонини ошириш юзасидан янги вазифалар белгилаб олинди.

Кейинги манзилда мавжуд имкониятлардан унумли фойдаланган ҳолда "яшил" энергия ишлаб чиқариш ҳажмларини ошириш мақсадида "Сурхон соҳили" маҳалласида 5 кВт’ли микроГЭС барпо этиш ишлари билан танишилди. Шунингдек, вилоят раҳбари "Йил аёли" миллий кўрик-танловининг республика босқичида фахрли 3-ўринни қўлга киритган, Сурхондарё вилояти Ички ишлар бошқармаси ЖХХ ҲП бошқармаси бошлиғи ўринбосари, подполковник Ўролтош Эшимовани эришган натижаси билан табриклаб, вилоят ҳокимлиги совғаларини тантанали топширди.