Сурхондарё вилоят ҳокимлигида 8 март – Халқаро хотин-қизлар кунига бағишланган тантанали тадбир бўлиб ўтди.

Тадбирда вилоят ҳокими Тўра Боболов мунис онахон ва опа-сингилларимизни байрам билан табриклаб, 17 нафар аёлга «Мўътабар аёл» кўкрак нишони ва қимматбаҳо совғаларни топширди.

Мамлакатимизда сўнгги йилларда хотин-қизларнинг ижтимоий-сиёсий фаоллигини ошириш, тадбиркорлигини қўллаб-қувватлаш, билим ва касбий кўникмалар эгаллаб, муносиб иш топишларига кўмаклашиш, саломатлигини сақлаш, уй-жой билан таъминлаш каби муҳим масалаларни ҳал этишга алоҳида эътибор қаратилмоқда. Давлат даражасида кўрсатилаётган ғамхўрликлар мунис опа-сингилларимизни янги Ўзбекистонни барпо этишнинг барча соҳаларида фаол иштирок этиб, Ватанимизни ижтимоий-иқтисодий ривожлантиришга муносиб ҳисса қўшишга ундаётир.

Сурхондарёда ҳам бу борада кенг кўламли ишлар амалга оширилмоқда. Айни пайтда воҳа аҳолисининг 1 миллион 329 минг нафари ёки 49,6 фоизи хотин-қизлардир. Уларнинг манфаатларини таъминлаш ва жамият ҳаётидаги ўрнини мустаҳкамлашнинг муҳим вазифалари белгилаб олинган.

Президентимиз раислигида жорий йил 26 февраль куни ўтказилган видеоселектор йиғилиши хотин-қизларнинг муаммоларини ҳал этиш ва уларни ижтимоий қўллаб-қувватлаш борасидаги ишлар натижадорлигини таъминлашда асосий йўналишларни белгилаб берди. Шунга мувофиқ вилоятда «аёллар дафтари»га киритилган хотин-қизлар муаммоларини ечиш, бандлигини таъминлаш, тадбиркорлигини қўллаб-қувватлаш, саломатлигини сақлаш, уй-жой масалаларини ҳал этиш борасида тизимли ишлар бошлаб юборилди. Жумладан, воҳада «Аёллар дафтари»га 28 минг 928 нафар хотин-қиз киритилган.

Биргина жорий йилнинг икки ойида уларнинг 3 минг 566 нафарига манзилли ёрдамлар кўрсатилди. Мазкур йўналишдаги ишлар изчил давом эттирилиб, 9 та мезон асосида аёлларни иш билан таъминлаш, ижтимоий қўллаб-қувватлаш, уларга тиббий ва психологик ёрдам қамровини кенгайтириш, оилавий ажралишларнинг олдини олиш чора-тадбирлари кўрилмоқда. Уй-жойга муҳтож 118 хотин-қиз учун уй барпо этилаётир.

Мамлакатимизда мўътабар аёл зоти ҳар тарафлама улуғланиб, меҳнати муносиб қадрланмоқда. Президентимизнинг жорий йил 4 мартдаги «8 март – Халқаро хотин-қизлар куни муносабати билан мукофотлаш тўғрисида»ги фармонига кўра, бир гуруҳ сурхондарёлик фаол опа-сингиллар, мўътабар онахонлар давлатимизнинг юксак орден ва медаллари билан тақдирлангани ҳам бунга яққол мисолдир.

Тантанали тадбирда бир гуруҳ фидойи хотин-қизлар вилоят ҳокимининг фахрий ёрлиқ ва қимматбаҳо совғалари билан тақдирланди.

Тадбирда сўзга чиққан хотин-қизлар кўрсатилаётган эътибор ва ғамхўрлик учун Президентимизга чуқур миннатдорлик билдирди.