Бугун, 10 декабрь куни тонги 06:40 лар чамасида Сурхондарё вилояти Термиз шаҳри “Ўзбекистон” маҳалласи Алишер Навоий кўчаси 24-уй яшовчи, 1965 йилда туғилган Н.В.нинг яшаш уйи ошхонасида табиий газ ва ҳаво аралашмасининг чақнаши содир бўлиб, чақнаш оқибатида В.Н.нинг бутун тана юзаси 3-4-даражали, 40-45 фоиз куйиш тан жароҳати олиб, Республика шошилинч тез тиббий ёрдам илмий маркази Термиз филиалига ётқизилган.

Ушбу бахтсиз ходисанинг содир бўлишига хонадонга ўрнатилган газ ҳисоблагич ҳисобдони қарз туфайли ўчгач, фуқаро В.Н. томонидан ўзбошимчалик билан газ ҳисоблагич ҳисобдонидаги фильтр қисмини ечиб олиши ва қўлбола усулда тайёрланган резина шлангни ноқонуний улаб фойдаланиши оқибатида хонага газ сизиб чиқиши газ-ҳаво аралашмаси чақнаши содир бўлишига олиб келган.

Воқеа жойига вилоят Фавқулодда вазиятлар бошқармаси, Тезкор бошқарув маркази ва Термиз шаҳар Фавқулодда вазиятлар бўлими раҳбарлари ва масъул ходимлари етиб боришган ҳамда шаҳар Фавқулодда вазиятлар бўлимининг 2 та ёнғин қутқарув экипажлари жалб этилган.

Афсуски, истеъмолчилар орасида қарздорлик бўйича автоматик тарзда табиий газ берилиши тўхтатилгандан сўнг, ўзбошимчалик билан электрон газ ҳисоблагичларини ечиб олиб, резина шланг ва қўлбола қувурлар орқали тармоққа уланиб олиб, табиий газдан ноқонуний равишда фойдаланиш ҳолатлари учрамоқда. Фақатгина ўз манфаатини кўзлаб иш тутаётган бундай истеъмолчилар туфайли ҳудуддаги газ таъминотида ўзгаришлар, уларни ҳисоблашда эса хатоликлар юзага келиши ва энг ачинарлиси нохуш ҳамда бахтсиз ҳолатлар юз бериши мумкин.