Bugun Termiz shahridagi “Grand Almas” tantanalar saroyida 8 mart – Xalqaro xotin-qizlar kuni munosabati bilan viloyatning asosiy bayram tadbiri tashkil etildi. Tadbirda viloyat hokimi Ulug‘bek Qosimov ishtirok etib, jamiyatimiz gultojlarini bahorning ilk ayyomi – Xalqaro xotin-qizlar kuni bilan samimiy tabrikladi.

Viloyat rahbari o‘z tabrik so‘zida xotin-qizlarimizning Vatanimiz taraqqiyoti va voha rivojiga qo‘shayotgan ulkan hissasi haqida to‘xtaldi. So‘nggi yillarda mamlakatimizda xotin-qizlarni e’zozlab, jamiyatdagi roli va mavqeini oshirish davlatimiz belgilab olgan siyosatning ustuvor yo‘nalishlaridan biriga aylangani qayd etildi.

Viloyatda 1 million 421 ming xotin-qiz istiqomat qilmoqda. Ularning qonuniy manfaatlarini ta’minlab, har taraflama qo‘llab-quvvatlashga alohida e’tibor qaratilmoqda. Jumladan, xotin-qizlar muammolarini o‘rganish va manzilli hal etish maqsadida “Ayollar daftari”ga kiritilgan 70 mingdan ortiq xotin-qizlarga manzilli yordam ko‘rsatildi. Xususan, 624 nafar uy-joysiz xotin-qizlar uy-joy bilan ta’minlandi. 150 nafar xotin-qizlarning oliy o‘quv yurtlarida tahsil olishlari uchun shartnoma pullari to‘lab berildi. Shuningdek, 21 ming 975 nafar xotin-qizlarga oilaviy tadbirkorlik dasturlari doirasida jami 404 mlrd so‘m imtiyozli kreditlar ajratildi.

Davlat boshqaruvining turli sohalarida faoliyat olib borayotgan rahbarlik salohiyati va qobiliyatiga ega bo‘lgan 1 ming 742 nafar xotin-qizlardan zaxira kadrlar shakllantirilib, ulardan 7 nafari Davlat boshqaruv akademiyasida “Rahbar ayollar maktabi” o‘quv dasturi asosida o‘qitildi.

Marosimda 17 nafar xotin-qizlarga “Mo‘tabar ayol” ko‘krak nishoni hamda ibratli hayoti va turli sohalardagi fidokorona mehnati uchun bir guruh fidoyi xotin-qizlar viloyat hokimining faxriy yorliq va esdalik sovg‘alari bilan taqdirlandi. Shuningdek, joriy yilda boquvchisini yo‘qotgan, uy-joyga muhtoj 300 nafar ayollarga yangi uy-joylar topshirilishi tak’kidlandi, ularning dastlabki 10 nafariga turar-joylar sertifikatlari topshirildi.

Bayram tadbirida poytaxtdan tashrif buyurgan hamda vohamizning taniqli san’atkorlarining kuy-qo‘shiqlari hamda badiiy jamoalarning bayramona chiqishlari ishtirokchilarga ko‘tarinki kayfiyat bag‘ishladi.

Bayram tadbirlari shahar va tumanlarda hamda korxona va tashkilotlarda qizg‘in davom etmoqda.