Кеча Сурхондарёда “Янги Ўзбекистон ёшлари, бирлашайлик!” шиори остида старт олган Ёшлар фестивали бугун эрта тонгдан оммавий югуриш ва байрамона юриш марафони билан давом этди. Минглаб йигит-қизлар Термиз шаҳридаги “Ёшлар маркази” биноси олдидан “Болажон” боғи бўйлаб "ICEBERG" кўнгилочар маркази биноси ёнигача ҳаракатланди.

Сурхондарё вилоятида “Янги Ўзбекистон ёшлари бирлашайлик” шиори остида бўлиб ўтаётган фестивалнинг очилиш маросими, санъаткорлар иштирокида концерт дастури

Сурхондарё вилояти ҳокими Тўра Боболовнинг ёшлар билан қизиқарли саволлар ва самимий жавобларга бой бўлган очиқ мулоқоти чоғида йигит-қизлар илм-фан, санъат ва адабиёт каби соҳаларда эришаётган ютуқлари ҳақида ҳамгапириб беришди. Ижодкор ёшлар вилоят раҳбарига чоп этилган илк китобларини туҳфа қилди. Куй-қўшиқлар ижро этди.

– Мен табиатан кечиримли инсонман. Ҳеч кимга, ҳеч қачон қасдлашмайман. Сиполикни ёмон кўраман. Ҳамма нарса табиий бўлиш керак, деб ўйлайман,– деди Тўра Боболов. – Ҳокимликка келсак, бу лавозимнинг тоши жуда оғир. Вилоятдаги ҳар бир инсоннинг муаммосини ўзимнинг муаммом, деб биламан. Мен сизларга ҳеч қачон ёлғон гапирмасликни, кўнгилда гина-қудрат сақламасликни ва камида иккита чет тилини чуқур ўрганишни маслаҳат бераман. Ота-онанинг, устознинг ҳурматига етишни, миллий қадриятларимизни улуғлашни тавсия этаман.

Термиз шаҳридаги “Санъат саройи” жойлашган сўлим боғда вилоят ҳокими, биринчи сектор раҳбари Тўра Боболовнинг ёшлар билан мотивацион учрашувида биринчи секторга қарашли Денов, Қизириқ, Бандихон, Бойсун, Шеробод туманлари ёшлари ва талабалар ўз ғоя ва таклифларини илгари сурди.